Curso con Sergio de la Ossa

“A Música tradicional no ensino da linguaxe musical”, curso intensivo que imparte este interesante curso Sergio de la Ossa os 5 e 6 de abril de 2014 no CMUS de Santiago. O prazo de inscrición é ata o día 7 de marzo. A riqueza e variedade da música tradicional galega convértena nun apoio excelente para a aprendizaxe da lectura e escrita da música, e dende logo tamén para a adquisición de técnicas musicais varias ademais de servir como ilustración e exemplificación de conceptos teóricos.

Para matricularte podes ver os detalles na web do Conservatorio Profesional de Compostela:

DURACIÓN E HORARIO

16 horas de duración: 5 de abril: 10:00 a 14:00 h e 16:00 a 20:00 h  e 6 de abril: 10:00 a 14:00 h

Sen número máximo de participantes

CONTIDOS

A riqueza e variedade da música tradicional galega convértena nun apoio excelente para a aprendizaxe da lectura e escrita da música, e dende logo tamén para a adquisición de técnicas musicais varias ademais de servir como ilustración e exemplificación de conceptos teóricos. Desde os xogos cantados e bailes sinxelos, pasando por mínimos artificios baseados no material mesmo (canon, quodlibet, etc.) e chegando a abordar conceptos máis complexos no estudo da música (escalas modais, ritmos asimétricos), neste curso descubriremos moito do que temos que aprender da música tradicional galega e moito do que ela nos ofrece como materia prima no ensino da música.
—Traballaremos con xogos cantados, bailes e cancións variadas, das que extraemos exercicios prácticos para o desenrolo auditivo, a percepción e execución rítmica, entre outras habilidades musicais

—Discutiremos a relación entre os exemplos propostos e a súa notación con conceptos concretos da teoría musical

—O material estará principalmente composto por música vocal. As pezas escollidas ilustran ritmos asimétricos ou aksak, escalas modais, formas simples e compostas, exemplos de versificación (romance, zéjel, seguidilla chamberga…), etc.

—O romance e a canción narrativa. Obradoiro de interpretación e creación, adaptación de melodías existentes a textos novos
—Ofreceranse guías para o emprego de gravacións auténticas no ensino da música e fontes e referencias da súa procedencia

OBXECTIVOS
—Comprender as estruturas musicais das que se compón a canción tradicional
—Obter unha visión global da riqueza da música tradicional galega e en concreto dos seus ritmos, as súas escalas ou sistemas tonais, as súas formas, a métrica poética e a relación texto/música
—Aportar una compilación de pezas musicais axeitadas para o ensino en múltiples niveis acompañada de consellos didácticos

MATERIAL
—Entregarase aos asistentes unha selección de partituras e textos utilizados no curso.

CursodelaOssa

SERGIO DE LA OSSA

Nace en Madrid en 1978, e vive desde 1982 en Compostela, onde realiza estudos de Mestre de Educación Musical (USC, 1996-1999). Trasládase despois a Hungría, e desde 2011 imparte a materia de ‘Folk Music’ no Instituto Kodály da Academia Liszt (Kecskemét), onde antes fora a completar a súa formación entre 2001 e 2004 (obtendo o novo Grao de Especialista en Pedagoxía Musical Kodály no 2010).
Recibe leccións e consellos sobre transcrición e catalogación de músicas tradicionais de parte das etnomusicólogas Mária Domokos e Olga Szalay, do Instituto de Musicoloxía (ZTI) da Academia Húngara das Ciencias, Budapest. Traballa desde 2007 na transcrición, edición e arquivo do material musical pertencente ao Arquivo do Patrimonio Oral da Identidade do Museo do Pobo Galego (www.apoi-mpg.org).
Exerceu como mestre de solfexo, guitarra clásica e harmonía na Escola das Artes (Brión) e na Escola de Música Berenguela (Compostela), e tamén ofreceu cursos e conferencias sobre música tradicional, baile, xogos e a adaptación do Método Kodály á realidade galega.
Ampliou o seu interese ao mundo do baile tradicional e á notación do movemento, eido no que destaca a súa participación como co-autor do libro de baile tradicional galego “Así fan os bailadores” (Dos Acordes, 2009).

About Folque

aCentral Folque, Centro Galego de Música Popular. Galiza, Europe

Bookmark the permalink.

Deixa un comentario