A ELMPG propón un cambio de formato para favorecer o acceso a interesados non residentes en Santiago do curso de Sergio de la Ossa sobre transcrición e análise de canción tradicional unha oferta pedagóxica sobre o xeito de transcribir melodías do cantigueiro galego e a súa análise musical.
Unha parte do material de traballo provirá dos fondos do APOI, co obxectivo de publicar finalmente na súa web, unha vez revisadas e editadas, unha selección das mellores partituras que se elaboren no curso. Esta é unha mostra de material xa publicado: MUS125 – MUS125 (audio) / MUS279 – MUS279 (audio).
Detalles:
+Duración: 16 horas
+Datas: DECEMBRO 13, 20
+Horas: de 10 a 14h e de 17 a 21h cada sesión
+Lugar: CSC Trisca
+Prezo: 80 €
+Contidos:
- Introdución á transcrición de música vocal tradicional do repertorio galego.
- Presentación e estudo de diferentes tipos de transcricións (principalmente prescritiva e descritiva), facendo especial fincapé na transcrición medianamente detallada que caracteriza a práctica actual húngara.
- Ornamentación e variación.
- Práctica individual de transcrición de pezas de distintos xéneros e dificultades, comezando polas máis sinxelas e atendendo aos diferentes niveles dos asistentes. Solicitarase o envío do material transcrito por correo electrónico antes da segunda sesión (escaneado ou fotografado de facerse a transcrición a man, ou en formato pdf ou jpg/tif de editarse con Finale, Sibelius, eMuse ou outros programas). O obxectivo é corrixir, poñer en común e debatir en grupo sobre os resultados; solucións particulares a casos de cantigas especiais.
- Ferramentas de análise baseadas na tradición etnomusicolóxica húngara, adaptadas á tradición galega.
- Tipos de versificación e métrica poética.
- Estudo e análise de pezas galegas e de cancións doutras culturas que presenten riscos semellantes aos das cantigas galegas, ou outros complementarios e descoñecidos que axuden a poñela en contexto.
+Obxectivos:
- Adquirir os coñecementos e desenvolver as capacidades básicas para encarar o tratamento profesional do estudo e a divulgación da música vocal da tradición galega.
+Material:
- Software recomendado: Transcribe! (by seventhstring). (Transcribe é un software de uso sinxelo, empregado por profesionais e de custo relativamente baixo (29€ aprox.), cuxas actualizacións son gratuítas). Outros programas de software libre cos que se poida ralentizar a música poden ser empregados a un nivel básico.
+Matrícula:
podes facer a prematrícula online nesta ligazón ou simplesmente escribir un mail directamente a matricula@folque.com
Sergio de la Ossa
É diplomado como mestre de Educación Musical pola USC. Completa a súa formación en Hungría entre 2001 e 2004 (obtendo o novo Grao de Especialista en Pedagoxía Musical Kodály no 2010). Desde 2011 imparte a materia de ‘Folk Music’ no Instituto Kodály da Academia Liszt (Kecskemét). Recibe leccións e consellos sobre transcrición e catalogación de música tradicional de parte das etnomusicólogas Mária Domokos e Olga Szalay, do Instituto de Musicoloxía (ZTI) da Academia Húngara das Ciencias, Budapest. Traballa desde 2007 na transcrición, edición e arquivo do material musical pertencente ao Arquivo do Patrimonio Oral da Identidade do Museo do Pobo Galego (www.apoi-mpg.org). Exerceu como mestre de solfexo, guitarra clásica e harmonía e tamén ofreceu cursos e conferencias sobre música tradicional, xogos e bailes e a adaptación do Método Kodály á realidade galega. Participou como co-autor do libro de baile tradicional galego “Así fan os bailadores…” (Dos Acordes, 2009).
