Este venres 27 de febreiro, a Casa de Cultura do Milladoiro (Ames) acolle un novo espectáculo de Os Contos de Joselín, unha oportunidade de recrear en clave contemporánea as historias cómicas do primeiro actor que gravou en galego nas históricas sesións do 1929. A actuación desta noite contará con dúas das voces máis importantes do país, Celso F. Sanmartín e Quico Cadaval que decorrerán ao longo duns 90′ polas historias que José Rodríguez de Vicente, Joselín, lles inspira. As entradas teñen un prezo de 5 euros para os maiores de 12 anos e os que posúan carné de estudante ou sexan maiores de 65 anos terán un desconto do 50%. Poden reservarse ata o propio venres ás 14:00 horas, a través do enderezo electrónico cultura.milladoiro@concellodeames.org ou no teléfono 981 53 59 40.
Historias de mortos, de caciques, de curas, de personaxes singulares… Baseado no libro Os contos de Joselín. Primeiros documentos sonoros do teatro galego (1929-1954). Un espectáculo que fai estalar o riso en todas as xeracións, dos maiores aos máis pequenos, sen distición. “Os Contos de Joselín” é un espectáculo de aCentral Folque cos contadores Quico Cadaval e Celso F. Sanmartín.
Na busca dun teatro de actualidade, lúdico, crítico e aberto á interacción co público, volven os ollos sobre a súa tradición: a dos contacontos. Unha historia aínda non contada na que se agochan incríbeis figuras como a de Joselín, o narrador galego de máis éxito de todo o século XX.
