Presentación do libro “Maruxa Boga”

Este mércores 7 de febreiro en Compostela preséntase o libro da Chave MestraMaruxa Boga. Recordando a Galicia“, unha nova entrega na colección de personaxes da memoria oral e musical galega. desta volta, a locutora de radio máis famosa da emigración galega arxentina que dirixiu un programa de variedades onde pasaron os mellores artistas da diáspora na quinta provincia galega. O acto contará coa presentaza dun dos autores, Xesús Blanco Rosas, o editor da colección Ramon Pinheiro e Mercedes Espiño da A.C. O Galo, entidade que amadriña este acto. A tarde estará acompañada cunha pequena actuación musical de Alba María que interpretará algún tango incluído no CD que acompaña a publicación.

O café Airas Nunes acolle esta presentación con entrada de balde a partir das 20.15 h.

Sobre o libro

Maruxa Boga, é a principal locutora dos espazos radiofónicos galegos en Arxentina nos que divulgou infinidade de músicas xeradas na colectividade da emigración desde 1945, cando crea -seguindo a proposta que lle fixera Castelao- o programa Recordando a Galicia.

Maruxa Boga foi unha das mulleres máis emblemáticas da emigración galega, pioneira na radiodifusión e no ámbito artístico-musical. Nacida en Río da Prata en 1915 asumiu como propia a orixe galega dos seus pais (de Barbanza), participando desde nova da efervescencia cultural que caracterizaba a emigración de Arxentina. Desde a década de 1930 destacouse como intérprete musical e tamén como actriz na posta en escena de “Os vellos non deben de namorarse”, de Castelao.

O seu primeiro contacto coa radio vén da man de Maruxa Villanueva, que en 1939 pensou nela para acompañala no proxecto de “Galicia”, a primeira radiorevista galega da emigración. Cando este espazo pechou, Maruxa Boga e o actor “Tacholas”, tomaron a iniciativa de apostar de novo por unha emisión de temas galegos e así naceu “Recordando a Galicia”, seguindo unha idea de Castelao. Pola súa calidade e audiencia o programa mantívose en antena desde 1945 ata 1984, o que o converte nun dos máis lonxevos da emigración.

Polo estudo de “Recordando a Galicia” pasaron intelectuais, artistas e escritores como Castelao, Luís Seoane ou Manuel Colmeiro. Pero sobre todo a audición foi un lugar de difusión e posta en valor da música galega creada en Arxentina, contando co amplo fondo musical que lle proporcionaban as principais casas discográficas locais e coas actuacións ao vivo das principais agrupacións, compositores e artistas residentes.

Mercar o libro

About Folque

aCentral Folque, Centro Galego de Música Popular. Galiza, Europe
Bookmark the permalink.

Deixa un comentario