Para este 2016 aCentral Folque organiza de novo un ciclo coa mellor música popular e cunha regularidade continua para a tempada inverno-promavera en Redondela. Por terceiro ano, a vila recibirá a presentación dos últimos discos que artistas do país e de fóra: Puntada sen fio (A lúa prendeu a luz), Davide Salvado (Lobos), Lagharteiras (Lagharteiras) e de Javier Marcos Quinteto (Ten Dez); así coma os artistas internacionais Toques do Caramulo (Portugal) ou Coladera (Brasil). Os concertos son o terceiro sábado de cada mes ás 21 horas.
Por terceiro ano, a mellor música tradicional contemporánea que se pode ver en Galicia dun xeito próximo, íntimo e regular bota as redes nun caladeiro fecundo coma a vila do fondo da ría de Vigo. Unha cita mensual coas mellores músicas populares galegas e peninsulares nun programa para presentar os traballos de artistas en activo no acolledor espazo do Auditorio da Xunqueira, no corazón da vila dos viaductos.
A Rede de Músicas Soltas (RMS) trae peixe fresco de tempada de inverno e primavera. A RMS é un ciclo de concertos promovido polo Concello de Redondela e organizado por aCentral Folque, Centro Galego de Música Popular. Concertos próximos ao redor da música popular, dos músicos con voz propia, e sos seus universos.
Coma vén sendo habitual, o cartaz do ciclo está deseñado polo artista local redondelán, Pablo Giraldez, O Pastor.
- Calendario: Terceiro sábado de mes (agás maio) de xaneiro a xuño.
- Hora: 21 h
- Lugar: Auditorio da Xunqueira de Redondela.
- Billetes: 5 €
- -Descontos: nen@s até os 10 anos, gratis. Moz@s até os 25 anos e persoas en situación de desemprego: 2 €
- Venda de entradas: Auditorio da Xunqueira 30 min. antes de cada concerto. Reserva no mesmo lugar, ou no teléfono 986 40 28 65, desde o xoves da semana de cada concerto.
- Alén dos concertos, haberá actividades (cursos e charlas) cos artistas na súa visita a Redondela. Máis información e inscricións aos cursos regularmente en info@folque.com
Descarga o programa de man aquí: Folleto_RMS_web
Programa de concertos
- 16/01/2016 _ Davide Salvado
Presentará o seu último e aclamado disco Lobos. Davide Salvado é unha das voces máis representativas da Galiza con reminiscencias do canto tradicional aderezado con outros xéneros urbanos modernos. O cantante marinense Davide Salvado estará acompañado cunha banda de excepción: Santi Cribeiro ao acordeón, Pablo Dalama ao saxo e frautas e Carlos Freire á percusión.
- 20/02/2016 _ Coladera
Mes de entroido coa visita desde o Brasil dun trio singular: Coladera. MPB (Música Popular Brasileira) con tinturas africanistas de Cabo Verde e saudade de fado lisboeta. Dous cantores únicos Vitor Santana e João Pires sostidos por um dos mellores percusionistas de Brasil, Marcos Suzano.
- 19/03/2016 _ Lagharteiras
Desde Mos e Redondela estas novas pandereteiras, Lagharteiras presentan o seu primeiro disco homónimo, unha escolma de cantos, regueifas, xotas, muiñeiras e mazurcas con diversos toques de pandeireta recollidos da tradicional oral galega.
- 16/04/2016 _ Toques do Caramulo
Segundo artista internacional para esta III Rede de Músicas Soltas de Redondela cos veciños Toques do Caramulo unha explosión de puro folk serrano, depois de 3 discos deste grupo de Águeda, no corazón de Portugal.
- 14/05/2016 _ Puntada sen fío
Novo proxecto nacido no 2015 dun grupo con base en Compostela que vén presentar o seu primeiro disco saido xusto un ano antes deste concerto. Puntada sen fio cantará as súas composicións contidas no album “A lúa prendeu a luz”. Elas son Xiana Lastra (voz), Juan Collazo (percusión) e Roberto Rama (saxo soprano).
- 18/06/2016 _ Javier Marcos
En formato de quinteto, Javier Marcos preséntase en Redondela para pechar o III ciclo da Rede de Músicas Soltas. Ten Dez é o título do primeiro álbum a solo por Javier Marcos, gravado nun quinteto con Rosolino Marinello no saxo tenor e clarinete baixo, a guitarra de Felipe Villar, Jose Manuel Diaz no baixo e Max Gomez na batería. “Ten Dez” é unha recompilación de arranxos de estándares e outras cancións cantadas en inglés e galego.
