Iniciado na percusión tradicional da man do mestre Henrique Otero. Acompañou ao gaiteiro Ricardo Portela na histórica gravación Alborada en Cotobande. Integrante de formacións coma Paseniño, Chouteira ou Tinta Femia. Desenvolve unha longa traxectoria como docente da que saíron destacados percusionistas da escena do folque tradicional.

Un dos gaiteiros solistas máis versátiles, internacionais e laureados de Galiza. Ten acadado os premios máis importantes en todos os certames de gaita (desde Ponteareas até Lorient). Solista da prestixiosa banda de gaitas Ancoradoiro. Titulado en Maxisterio Musical, destaca polo seu labor docente ao fronte de bandas de gaitas.

Personalidade de grande peso no folque galego desde os anos 90, foi membro de Saraibas e Os Cempés. Actualmente desenvolve o seu labor como compositor, arranxista e intérprete con bOnOvO, e en distintos proxectos audiovisuais. É a referencia galega no emprego da zanfona electroacústica.

É diplomado en Educación musical e licenciado en Psicopedagoxía, ten unha marcada experiencia e formación pedagóxica no eido musical e da educación formal. Ligado aos escenarios dende os 7 anos de idade, ten participado e colaborado en diversas formacións tales como Ardelle o Eixo, Os Cempés, Pablo Seoane Grupo ou Descarga ao vivo Galiza-Cuba.
Como intérprete de violino conxuga as linguaxes tradicionais e clásicas, así coma dos recursos máis contemporáneos do instrumento.

Intérprete, docente, compositor e produtor, coñece varios instrumentos. Está ligado a proxectos como Laio, Nuke Trío, Talabarte Trío, Marful, Descarga ao Vivo… Tocou con solistas das músicas tradicionais como Leilía, Uxía Senlle, Budiño ou María Salgado e músicos como Jacky Molard, Soïg Sibèril, Donal Shaw, Tony McManus, Mercedes Peón, Kathryn Tickell, Javier Bergia, Tanya Tagaq, David Herrington… Actuou nos espazos máis importantes da Península, tamén en Francia, Bélxica, Holanda, Alemania, Canadá ou Cuba.

Polifacético artista especializado en instrumentos de vento: gaita, cromorno, chirimía, frautas de bico e traveseiras. Membro fundador dos grupos de música antiga Martín Códax e Acibreira. Imparte aulas de gaita e requinta desde o 1995. Será o director do conxunto instrumental de alumnos de 1º Ciclo.

Titulado superior en Oboe. Especializouse en Análise de música tradicional e traballo de recollida con Dorothé Schubarth. Profesor de Linguaxe musical no Conservatorio Oficial de Lalín. Solista da Orquesta Sinfónica de Lalín. Membro do grupo Grodan de Fló e Linho do Cuco, premiado no festival internacional de Lorient.

Investigador especializado en documentación musical. Licenciado en Historia e posgraduado en Xestión de empresas musicais. Discípulo do gaiteiro Moxenas, participou en bandas coma Chouteira e Ecléctica Ensemble. Socio-fundador das empresas Ouvirmos e Lonxa Cultural. É o director artístico do CGMP.

Inconfundíbel voz e instrumentista de Berrogüetto, banda coa que xirou por Europa e América. Actualmente en proxectos coma Nordestin@s ou Espido. Titulada en Maxisterio Musical, é unha das cantantes máis persoais da música galega e profesora cunha longa experiencia pedagóxica.