Este mércores 3 de xuño a partir das 20.30 h no Auditorio Milladoiro da Escola de Artes e Oficios de Vigo aCentral Folque fará a segunda presentación dun libro da colección da Chave Mestra na E-Trad, escola de música tradicional de Vigo, aberta a todo o alunado e público interesado en coñecer detalles sobre persoeiros da tradición oral e musical galega.
Desta volta será presentado o libro “Amadeo Goyanes e as zanfoneiras de Monforte”. O acto contará coa presenza do autor do texto, Pablo Quintana, o editor e coordinador da Chave Mestra, Ramon Pinheiro. O presentador será o mestre de zanfona da E-Trad, Anxo Pintos. Ao final haberá unha actuación especial da Aula de zanfona da E-Trad.
En 2015 cúmplese o centenario do nacemento do monfortino Amadeo Goyanes Vázquez e o XX aniversario do seu pasamento. Un momento no que deterse para profundizar no coñecemento dunha figura clave e fundamental na música tradicional galega e particularmente no movemento de rexeneración da zanfona en Galiza, onde foi todo un pioneiro.
Aproveitando a efeméride do centenario do seu nacemento e XX aniversario da súa morte, aCentral Folque pretende salientar o traballo fundamental dun persoeiro que fundou a primeira escolanía de zanfonas de Galicia, constructor humilde e mestre gaiteiro e zanfoneiras. O resultado é un libro con CD cun detallado texto sobre a vida e traballo musical de Amadeo Goyanes ameno e curioso para todos os públicos: partituras editadas para os músicos e especialistas da zanfona e un disco compacto no que se encontran inéditos de Amadeo Goyanes. Ademais deses históricos rexistros, graváronse especialmente para esta publicación músicas do seu repertorio e novos temas saídos da factoría da aula de zanfona da Escola Livre da MPG sita en Santiago de Compostela.
