Quinto concerto do ciclo No Campo de Fóra que aCentral Folque leva aos centros socioculturais de Santiago cun histórico da canción galega. Xosé Lois Rivas ‘Mini’, músico, militante e fundador de proxecto seminais coma Fuxan os Ventos ou A Quenlla actuará no CSC da Trisca o mércores 21 de maio ás 19 h con entrada libre até completar capacidade.
O programa que presenta será a medio camiño entre o concerto e a mostra didáctica baixo o tema ‘Arredor da música tradicional’ con repertorio sobre os Camiños, os alalás, as xotas, as muiñeiras, as coplas de cego, o ciclo de Nadal,…
Sobre o artista
Xosé Luís Rivas Cruz, alcumado Mini é un profesor, cantautor, compositor, musicólogo e político galego. Formou parte da banda Fuxan os Ventos dende a súa fundación até 1982. En 1984, xunto con Baldomero Iglesias Dobarrio “Mero”, forma A Quenlla. Nese mesmo ano fixo a música para a curtametraxe Mamasunción.
No ano 2007 cedeu, canda o seu compañeiro “Mero”, as recollas de cantos, bailes, lendas e refráns recompiladas ao longo da súa traxectoria, ao Museo do Pobo Galego. Todo este repertorio foi dixitalizado e posto a disposición dos interesados no patrimonio oral galego.
Destaca como compositor e adaptador de cancións galegas e leva a cabo un intenso labor de recompilación do folclore de Galiza
